Salawas bulan puasa ngini, Nanang Supak pina rajin sembahyang. Kada nangkaya hari biasa, sembahyang belang kambingan, wayah sembahyang, wayah kada. Tumatan awal puasa sampai hari ka-ampat ngini, paparak magrib, Nanang Supak sudah pandahuluan ka langgar.
Kamarian sore pas handak babukaan puasa, Nanang Supak sudah badahulu mambuka lawang langgar. Pas rahatan di langgar tatamu Julak Ibus nang kabalujuran lewat di muka langgar.
“Umai, rajinnya nyawa ka langgar Nang, kada biasanya. Rajin tu, sembahyang di rumah gin kada talihat, ini sungsung banar sudah ka langgar,” jar Julak Ibus managur. “Ham tasalah jua ulun rajin ka langgar. Kada salah kalu ulun ka langgar, timpulu bulan puasa,” sahut Nanang Supak.
“Kada kayak itu pang, unda managur haja, nyawa pina rajin,” jar Julak Ibus. “Umur ulun nih sudah tuha Lak-ai, wayah apa lagi handak bataubat. Timpulu sigar, timpulu masih dibari Tuhan umur panjang,” jar Nanang Supak.
Asik bapandiran, banyak urang kampung di wadah Nanang Supak nang ke langgar, ma-antarakan makanan wan wadai gasan babukaan puasa. Ada nang ma-antari wadai bingka, ada nang ma antari wadai kakaraban, lawan ada jua nang ma antari es nyiur anum.
Malihat urang nang rami ma-antari macam-macam makanan wan minuman, batakun-ai Julak Ibus wan Nanang Supak. “Umai banyaknya urang ma antari makanan wan minuman, gasan siapa ngitu Nang?” jar Julak Ibus. “Gasan siapa pang lagi, gasan urang babukaan puasa di langgar pang,” sahut Nanang Supak.
“Banyak kah urang babukaan puasa di langgar ngini? Tamakani jua kah wadai sing banyakan ngitu?” jar Julak Ibus. “Mun banyak kada jua pang, sampai hari ini, paling sekitar ba ampat atawa balima lah nang buka puasa di langgar,” jar Nanang Supak.
Lawas bapandiran, kada tarasa pas handak babukaan puasa. Pina kada talihat urang datang handak babuka puasa di langgar, Nanang Supak wan Julak Ibus di langgar.
Limbah itu, Nanang Supak manyiapakan makanan dan minuman di langgar. Kada sa-apa sampai waktu urang babuka puasa. “Kawani ulun Lak-ai babuka puasa di langgar sini lah?” jar Nanang Supak. Umpat ai jua Julak Ibus babukaan puasa di langgar. Tuntung babuka puasa, Nanang Supak bang sembahyang magrib, habis itu sembahyangan Nanang Supak wan Julak Ibus. Tuntung bamagrib, Nanang Supak manyimpuni ka wadai wan minuman nang tasisa.
“Ayu-ai kita bulikan dulu Lak-ai, kaina ba asa pulang ka langgar paparak Isya,” jar Nanang Supak sambil mahangkut wadai wan minuman sisa babukaan puasa. “Bah iya banar-am, cucuk nyawa rajin buka puasa di langgar, banyak nang dihangkut bulik, cucuk haja pina rajin,” jar Julak Ibus. “Daripada dimakan angin, baik ulun bawa bulik Lak-ai, malaran gasan sahur,” jar Nanang Supak kada tahu-tahu muha.(*)
