Babulan-bulan kampung Nanang Supak di Martapura tarandam banyu. Maka kada alang-alang, banyunya tinggi banar, parak sapinggang. Nanang Supak wan urang kampung pina bapicik kapala salawas kabanjiran ngini. Saban hari Nanang Supak haur manggarunum haja lawan Julak Ibus.
Wayah itu, Nanang Supak rahatan menyimpuni rumah nang tarandam, manaikkan pakakas rumah ka atas lamari wan mija. Sambil basasimpun, sambil bamamai saurangan.
“Harau mauk banar kayak ini, wayahapa jua banyu ngini surut lah. Guring kada kakaruan, kalu banyu sasar badalam. Musiah rahatan asik guring, badalam banyu, timbul guring di atas banyu,” jar Nanang Supak manggarunum.
Rahatan itu, bacungul Julak Ibus lawan tantaran ujun di bahu. “Kada usaha manggarunum Nang-ai, disyukuri haja, baik bawa ma unjun. Musim banjir kayak ini, bisa banyak kulihi iwak Nang-ai,” jar Julak Ibus manyahuti.
“Bah, kada kawa mamikirakan maunjun Lak ai, bahujung pakakas rumah tahambur larut dibawa banyu,” jar Nanang. “Nangapa ngalih-ngalih nyawa, tiap pakakas rumah ngitu, kayak ranjang, lamari, mija, kursi atau lainnya, dijarat haja wan tali rapia, ikat di tihang, kada pataha larut pang,” Julak Ibus mamadahi.
Lamun sual banjir ngini, jar Julak Ibus, kada kawa menyalahakan siapa-siapa. “Inya manusianya jua nang tasalah. Puhun-puhun hutan ditabangi, gunung-gunung dikaruk gasan batubara, ditambahi hujan kada ba ampihan, kayapa kada banjir sa alaman,” jar Julak Ibus.
“Nang handak ulun takunakan lawan pian Lak-ai, nang katuju manabang puhun wan ba usaha batubara ngitu, ada jua kah inisiatif mananami puhun lagi, atawa manutupi lubang-lubang habis batubara ngitu? Supaya bakurang banjir,” jar Nanang Supak.
“Talalu jauh nyawa mamikirakan ngitu Nang-ai, itu urusan urang di atas. Kita rakyat jalata ngini, mananggung akibatnya haja. Jadi nang kita pikirakan, kayapa supaya kita kawa hidup?” jar Julak Ibus.
“Bah kada kawa kayak itu Lak-ai, maulah kita mananggung akibatnya haja, nang nyaman buhan di atas,” sahut Nanang Supak mangarasi. “Limbah pang kayapa gerang kahandak nyawa?” sahut Julak Ibus.
“Kahandak ulun kah? Bila wayah banjir kayak ini, buhan nang sugih-sugih, khususnya buhan nang ba usaha manabangi puhun di hutan atawa nang manambang batubara, ma ungkusi kita sabarataan sampai banjir ampih. Mun kawa baras ditukarakan sampai ampih banjir, umpama sabuah rumah dibarii baras dua atau tiga blek, ngini sakali mambari mi lima bungkus, nasi sabungkus. Ngitu cukup gasan sahari haja. Lamun banjirnya dua bulan, bantuan ngitu gasan sahari, sisanya 59 hari kita bacari saurang, manangis anak bini, nasib haja lagi,” jar Nanang Supak.
“Lamun nyawa handak kayak itu, ada ai jalannya Nang-ai, supaya kada ngalih makan,” jar Julak Ibus. “Kayapa?” jar Nanang Supak. “Nyawa bawai urang kampung sabarataan, hangkut aja kulawarga sabarataan bapasang tarpal di muka rumah kapala daerah, jadi buhan nyawa minta ungkusi makan di situ haja, kada pataha kalaparan nyawa,” jar Julak Ibus. “Hiih bujurai, hanyar bapasang tarpal, kada lawas diusir urang,” jar Nanang Supak. Hinip Julak Ibus.(*)
