Tuntung kabanjiran, Nanang Supak wan Julak Ibus, Amat Kurup haur babarasih rumah. Lantai rumah buhannya hibak wan lumpur haja, baluman lagi ratik-ratik puhun wan sabat rumput hibak di dalam rumah. Saban hari buhan Nanang Supak haur basa-sikat lantai rumah haja. Maka kada ngitu haja, limbah turun ka tangah jalan, naik ka rumah, babamai Nanang Supak.
Wayah itu, Nanang Supak tuntung babarasih rumah, pas turun ka tanah, naik ka rumah hibak sandal sapit wan licak haja. “Kayapa ngini nah handak barasih rumah. Sudah rumah nang rigat, jalan pulang di muka rumah licak haja bakas tarandam banyu,” ujar Nanang Supak manggarunum di palatar rumah wan Julak Ibus.
“Nyawa jangan bamamai wan unda Nang-ai,” sahut Jual Ibus. “Limbah pang bamamai lawan siapa, timpulu pian di sini,” jar Nanang. “Nangapa nih pina handak bacakut haja basungsungan hari,” Amat Kurup bakajutan cungul. “Ini pang Nanang Supak haaaaur handak bamamai haja,” sahut Julak Ibus.
“Cuba nyawa bayangakan Mat, tuntung banjir ngini, rumah licak, jalan licak, sabarataannya licak. Kada kakaruan ba usaha kayak ini,” jar Nanang. “Pina musti nyawa kisah ba usaha, hari-hari nyawa ngitu ma udak handphone haja, wayahapa bagawi,” jar Amat Kurup. “Ma udak handphopone ngitu gin ngarannya ba usaha jua,” jar Nanang Supak kada handak kalah. “Ba usaha nangapa?” jar Amat pulang.
“Ba usaha jadi artis tik tok,” jar Nanang Supak. “Muha nagkaya kulit nangka ngitu, kisah handak jadi artis tik tok lah?” jar Amat Kurup. “Baik jua muha nangkaya kulit nangka, nyawa tu pang, muha iya banar kulit durian, mata nangkaya urang kada baguringan setahun, babaya kalihatan,” jar Nanang Supak menyumpahi Amat Kurup.
“Sudah, ampih-ampih pang basambatan. Unda handak batakun, nyawa kenapa garang nang pina bamamai haja tumatan tadi,” jar Julak Ibus mambulikakan pandir. “Kayapa ulun kada handak bamamai Lak ai, jaka pang buhan pamarintah ngini, jangan wayah pamilihan haja barabut handak jadi kapala daerah, jadi anggota dewan. Jaka pang dipikirakan banjir wadah kita ni nah, kayapa jua supaya kawa ampih. Bapuluh-puluh tahun nangkaya ini haja, kaina wayah banjir babagi bantuan. Jaka dikumpul-kumpulakan duit babagi bantuan ngitu tumatan bahari sampai ka wayahini, bisa-bisa sudah kawa ma ulah waduk nangkaya di riam kanan situ. Ham pamarintah kita ngini pintar kah atau kalimpatan pintar kah,” jar Nanang Supak.
“Bujur jar nyawa Nang-ai. Jaka duitnya diulahakan tabat kaliling kampung, supaya banyu kada masuk kampung. Sanunuhan banyak duit rakyat dibawa bakunjangan, ba-umuran kayak itu haja gawian,” ujar Amat Kurup.
“Limbah bagusnya handak kayapa nyawa Nang?” jar Julak Ibus. “Handak ulun kah? Kaina lamun tahun dudi banjir lagi, ulun handak membawai buhan urang kampung guringan di gedung wakil rakyat haja. Mengungsi di sana. Jadi guring di sana, bamasak di sana, nyaman buhan wakil-wakil rakyat di sana itu tahu wan ka adaan buhan kita nih,” jar Nanang Supak.(*)
