SUNGSUNG banar Nanang Supak sudah mawarung, minum kupi, baroko, sambil ma-udak talipun. Satumat-satumat kaina ketawa saurangan Nanang Supak. Rahatan asik ma udak talipun, Amat Kurup nang kabalujuran handak maliwati warung, tamandak. Lalu basinggah di warung ngitu. “Umai…pina asik banar nyawa mangalakak saurangan Nang?” jar Amat Kurup manakuni Nanang Supak.
“Iya nah Mat, handak kamana nyawa?” jar Nanang Supak manyahuti. “Handak ka pasar nukar umpan iwak, malihat nyawa ketawa saurang basinggah ai dulu nah satumat,” jar Amat Kurup. “Nangapa nyawa tawakan pina bahimat?” Amat Kurup bapandir lagi.
“Ini pang Nah, rami banar video di tik-tok ngini, macam-macam urang manyambati tukang cuntan duit rakyat, limbah itu dihukum pajara anam satangah tahun haja. Maka duit nang dicuntannya kada kahitungan, banyak banar Mat ai…., tiga ratus taraliun. Kayapa banyaknya ngitu lah…? Lamun ditukarakan gabin sa-apa Mat lah…? jar Nanang Supak.
“Jangankan tiga ratus taraliun Nang-ai, satu miliar haja gin lamun ditukarakan gabin, limbah itu larutakan di Sungai Martapura, kira-kira tumatan Martapura sampai ka Banjar, banyu Sungai Martapura ngini bisa karing Nang-ai, tahisap gabin sing banyakan. Apalagi satu taraliun, tukarakan ka gabin, gabinnya larutakan ka laut, bisa karing laut,” jar Amat Kurup mahalabiu.
“Harau dasar bujur Mat-ai. Nyaman banar wayahini panjahat nang katuju mancuntan duit rakyat ngini Mat lah….? Batuyuk duit nang dicuntan, harau cagar masuk panjara satumat banar, anam satangah tahun ngitu sama lawan hukuman maling ayam haja saku Mat ai…,” jar Nanang Supak.
“Bah kada harapan sampai anam satangah tahun di panjara Nang-ai. Bujur haja dipuitus hakim, hukumannya anam satangah tahun. Baluman lagi dikurangi masa tahanan, ramisi, limbah itu dikurangi tahanan di panjara…, apa tuh ngarannya…Cibi kah, paling-paling sisa di panjara tiga tahun,” jar Amat Kurup.
“Harau bujur banar nyawa ngitu Mat ai…, limbah tuntung di panjara, balinggang inya kaluar ba isian duit sing banyakan, kawa gasan tujuh belas turunan, kada tujuh turunan lagi,” jar Nanang Supak.
“Mbah, nangapa maksud nyawa mangisahkan ngini. Bahiri kah nyawa, kalu ai handak manuruti jua, mancuntan duit siapa kah…?” jar Amat Kurup. “Babungulan unda manuruti gawian ngitu Mat ai…, nang unda pikirakan, tapi mahayal aja pang, jaka kawa rahatan nang mancuntan duit rakyat ngitu di panjara, unda manggandaki bininya. Rahatan lakinya di panjara, unda tukang habisakan duitnya. Jadi duitnya dapat, bininya dapat jua,” jar Nanang Supak mahayal. “Bhahahaha…, acil katupat gin bapikir bagandakan lawan nyawa Nang-ai, muha pina tahalang ngitu,” jar Amat Kurup sambil bajalan, maninggalakan Nanang Supak. (*)
