Nanang Supak ngini urangnya kada tapi banyak pandir alias pandiam. Urangnya liwar pangulir, gawiannya haur ma udak talipun haja. Tumatan bangun guring sampai bapicak mata, taaa…lipun haja nang diurus. Wayah makan, bakamih, sampai bahira talipun haja di tangan. Nanang Supak basapupu lawan Acil Idah. Kakawannya sapalih urang tuha, sapaling nang sapantaran. Nangkaya Julak Ibus lawan Amat Kurup.
Ba isukan ngitu, Nanang Supak ma-ungut di palatar rumah, sambil ma udak talipun. Limbah itu, cungul Julak Ibus lawan tapih-tapih pina handak tabalului, kupiah hirang tahalang di kupala. “Ba apa nyawa Nang, basungsungan hari sudah ma udak talipun, jaka mandikah hulu,” jar Julak Ibus. “Kada usah manggaduhi urang Lak-ai. Pian gin ba-pa basungsungan hari bakunjang ke sini, lawan tapih-tapih nang pina babau hancing ngitu. Jaka bawirid di rumah, sumbahyang dhuha kah, diri sudah tuha, kalu pina jiun,” sahut Nanang Supak.
“Dasar kananakan wayahini lah, bisa banar manyahut. Dipadahi, inya umpat mamadahi urang tuha. Jauh banar ma asi,” Julak Ibus manyahuti pulang. Limbah itu, Julak Ibus singgah di palatar rumah Nanang Supak.
Kada lawas, tumatan dalam rumah, cungul sapupu Nanang Supak, si Acil Idah. “Umai sidin nang badua ngini lah, kada nang anum kada nang tuha, basungsungan hari marotet haja. Jaka bagawian apa kah?” jar Acil Idah mancarocos.
“Pas banar nyawa bacungul Dah..ai, ulahakan unda kupi pang, cangkir halus haja,” jar Julak Ibus manyuruh Acil Idah. “Pina musti pian manyuruh ulun, di sini lain warung Lak-ai…, bayar sapuluh ribu, hakun ai ulun ulahakan,” Acil Idah kada handak kalah manyahuti.
“Uma…uma…., lawan mamarina kayak itu nyawa lah. Pamalar banar nyawa Dah…lah, ayuha kaina lamun unda kulihi iwak ma unjun, unda bayari lawan iwak,” jar Julak Ibus.
“Tasarah pian haja sudah,” jar Acil Idah marangut muha, sambil ka dapur handak ma ulahakan kupi. Rahatan Acil Idah ka dapur, hancap Nanang Supak mendatangi. Wayah Acil Idah ma-ulahakan kupi, limbah itu Nanang Supak mambisiki lawan Acil Idah, jangan digula-i Cil…ai, gulanya diganti lawan uyah haja,” jar Nanang Supak.
“Mbah nyawa ngini, musiah sidin bahiraan kayapa?” sahutnya. “Ayuha kadapapa, nyaman sidin jara minta ulahakan kupi lawan pian. Paling bahiraan satumat,” jar Nanang pulang.
Tuntung ma ulahakan kupi, badadas Acil Idah ma-antarakan kupi wan Julak Ibus ka palatar rumah. Takarinyum muha Julak Ibus malihat kupi di tangan Acil Idah. Hancap sidin malikit rokok. “Pas banar kayak ini, baroko ai dulu sambil mangupi, nikmat mana nang pian karamputakan,” jar Julak Ibus kahimungan.
Limbah Acil Idah manjulung kupi, hancap Julak Ibus mahirup kupi nang disurung. Babaya sahirupan, Julak Ibus langsung maluak, sambil manyumpah kada sing rantian. “Cuh…., binahung banaran nyawa Dah..lah, nyawa buati apa kupi ngini rasa mahung-mahung,” jar Julak Ibus. “Lain ulun Lak-ai…, Nanang Supak nang mambuati uyah di kupi pian,” jar Acil Idah. “Dasar kananakan kada tahu adat nyawa ngini Nang-ai…., cucuk haja uma nyawa bahari bapadah lawan unda, nyawa ngini tuhuk gugur di ayunan, iya nang kalakuan kada sumparaka,” jar Julak Ibus hancap bulik.(*)