Kamarian sore Nanang Supak ma ungut di palatar rumah. Pina basangga wihang, lintuhut di naikkan, talapak tangan manyangga ka dagu. Rahatan asik ma ungut basangga wihang, Acil Idah mangajuti tumatan dalam rumah. “Na! Napa ni nang diungutakan?” jar Acil Idah mamarina Nanang Supak. “Ajin ni malamun handak babini?” jar Acil Idah.
“Bah lah…., musim kayak ini handak babini, manyakiti kapala banar ham Cil ai. Jangan kan handak babini, manukar baras gin sing ngalihan, ba usaha wayah ada wayah kadada, handak babini, timbul tamakani pasir anak urang,” sahut Nanang Supak.
“Kada bulih nyawa kayak itu Nang-ai. Razaki ngitu sudah dijamin Tuhan. Jadi kada bulih nyawa basangka buruk,” jar Acil Idah. “Ulun kada basangka buruk Cil-ai, tapi ngini kanyataan?” sahut Nanang Supak. “Urang tu kita ba ikhtiar haja, sual razaki insya Allah ada haja,” Acil Idah mamadahi.
“Pian tahu haja kalo Cil, wayah musim banjir kayak ini, liwar ngalih nya ba usaha, mancari makan gin sing ngalihan. Sanunuhan ada bantuan, pinanya banyak nang kada dapat dibarii, nang dapat pinanya kula-kulanya haja. Ulun haja sampai wayahini, suah dapat dibantu nasi sabungkus, mi lima bungkus, itu haja, bakantut gin padih Cil ai,” ujar Nanang Supak.
“Bah nyawa ngini tahu salahakan haja, nang ngaran manusia banyak, kada kawa pang sabarataan nang dapat bantuan, pasti ada nang tatinggal-tinggal,” jar Acil Idah.
“Ujar habar Cil-ai, nang dapat bantuan ngitu buhan nang mandukung buhan sidin-sidin haja, nangkaya buhan anggota dewan tuh, paling nang dibantunya nang mandukung inya samalam, lamun kada mandukung, pacangan kada dibantunya,” jar Nanang Supak kada mau kalah.
“Bujuran jua kah nyawa ngini?” jar Acil Idah. “Ulun manangguh-nangguh aja Cil-ai. Tapi kanyataannya, ulun parhatiakan pina kayak itu pang. Jadi wayah ini, lamun kadada janar jarangaunya alias kadada tasangkut paut lawan pandukung atawa papadaannya pacangan ngalih dapat bantuan. Jadi baik baranai, mambari supan banar ai maminta-minta nangkaya pangamis haja lagi,” jar Nanang Supak pina habang muha.
“Uuuh kayak itu kah?” jar Acil Idah. “Iya pian ngini haur ma-udak handphone haja pang, jadi kada tahu habar-habar urang,” jar Nanang. “Ba apa jua unda manggaduhi nang kayak itu. Makanya dudi-dudi bila musim pamilihan anggota dewan kah atau kapala daerah kah, itihi bujur-bujur. Baik mamilih kula-kula saurang haja, mamilih urang lain cagar kada dihirani jua, pahadangan pamilihan banar ai pina baik, pina lamah, kaputingannya kada dihirani jua,” jar Acil Idah.(*)
